| |
|

This overlay will guide you through the buttons:

Shloka 1
व्यास उवाच ।।
इत्याकर्ण्य श्राद्धदेवः सूर्यान्वयमनुत्तमम् ॥ पर्य्यपृच्छन्मुनिश्रेष्ठश्शौनकस्सूतमादरात् ॥ १ ॥
ityākarṇya śrāddhadevaḥ sūryānvayamanuttamam .. paryyapṛcchanmuniśreṣṭhaśśaunakassūtamādarāt .. 1 ..
Shloka 2
शौनक उवाच ।।
सूतसूत चिरंजीव व्यासशिष्य नमोस्तु ते ॥ श्राविता परमा दिव्या कथा परमपावनी ॥ २ ॥
sūtasūta ciraṃjīva vyāsaśiṣya namostu te .. śrāvitā paramā divyā kathā paramapāvanī .. 2 ..
Shloka 3
त्वया प्रोक्तः श्राद्धदेवस्सूर्य्यः सद्वंशवर्द्धनः ॥ संशयस्तत्र मे जातस्तं ब्रवीमि त्वदग्रतः ॥ ३ ॥
tvayā proktaḥ śrāddhadevassūryyaḥ sadvaṃśavarddhanaḥ .. saṃśayastatra me jātastaṃ bravīmi tvadagrataḥ .. 3 ..
Shloka 4
कुतो वै श्राद्धदेवत्वमादित्यस्य विवस्वतः ॥ श्रोतुमिच्छामि तत्प्रीत्या छिंधि मे संशयं त्विमम् ॥ ४ ॥
kuto vai śrāddhadevatvamādityasya vivasvataḥ .. śrotumicchāmi tatprītyā chiṃdhi me saṃśayaṃ tvimam .. 4 ..
Shloka 5
श्राद्धस्यापि च माहात्म्यं तत्फलं च वद प्रभो ॥ प्रीताश्च पितरो येन श्रेयसा योजयंति तम् ॥ ५ ॥
śrāddhasyāpi ca māhātmyaṃ tatphalaṃ ca vada prabho .. prītāśca pitaro yena śreyasā yojayaṃti tam .. 5 ..
Shloka 6
एतच्च श्रोतुमिच्छामि पितॄणां सर्गमुत्तमम् ॥ कथय त्वं विशेषेण कृपां कुरु महामते ॥ ६॥
etacca śrotumicchāmi pitṝṇāṃ sargamuttamam .. kathaya tvaṃ viśeṣeṇa kṛpāṃ kuru mahāmate .. 6..
Shloka 7
सूत उवाच ।।
वच्मि तत्तेऽखिलं प्रीत्या पितृसर्गं तु शौनक ॥ मार्कण्डेयेन कथितं भीष्माय परिपृच्छते ॥ ७ ॥
vacmi tatte'khilaṃ prītyā pitṛsargaṃ tu śaunaka .. mārkaṇḍeyena kathitaṃ bhīṣmāya paripṛcchate .. 7 ..
Shloka 8
गीतं सनत्कुमारेण मार्कण्डेय धीमते ॥ तत्तेऽहं संप्रवक्ष्यामि सर्वकामफलपदम् ॥ ८ ॥
gītaṃ sanatkumāreṇa mārkaṇḍeya dhīmate .. tatte'haṃ saṃpravakṣyāmi sarvakāmaphalapadam .. 8 ..
Shloka 9
युधिष्ठिरेण संपृष्टो भीष्मो धर्मभृतां वरः॥शरशय्यास्थितः प्रोचे तच्छृणुष्व वदामि ते ॥ ९॥
yudhiṣṭhireṇa saṃpṛṣṭo bhīṣmo dharmabhṛtāṃ varaḥ..śaraśayyāsthitaḥ proce tacchṛṇuṣva vadāmi te .. 9..
Shloka 10
युधिष्ठिर उवाच ।।
पुष्टिकामेन पुंसां वै कथं पुष्टिरवाप्यते ॥ एतच्छ्रोतुं समिच्छामि किं कुर्वाणो न सीदति ॥ 5.40.१० ॥
puṣṭikāmena puṃsāṃ vai kathaṃ puṣṭiravāpyate .. etacchrotuṃ samicchāmi kiṃ kurvāṇo na sīdati .. 5.40.10 ..
Shloka 11
।। सूत उवाच ।।
युधिष्ठिरेण संपृष्टं प्रश्नं श्रुत्वा स धर्मवित् ॥ भीष्मः प्रोवाच सुप्रीत्या सर्वेषां शृण्वतां वचः ॥ ११ ॥
yudhiṣṭhireṇa saṃpṛṣṭaṃ praśnaṃ śrutvā sa dharmavit .. bhīṣmaḥ provāca suprītyā sarveṣāṃ śṛṇvatāṃ vacaḥ .. 11 ..
Shloka 12
भीष्म उवाच ।।
ये कुर्वंति नराश्श्राद्धान्यपि प्रीत्या युधिष्ठिर ॥ श्राद्धैः प्रीणाति तत्सर्वं पितॄणां हि प्रसादतः ॥ १२ ॥
ye kurvaṃti narāśśrāddhānyapi prītyā yudhiṣṭhira .. śrāddhaiḥ prīṇāti tatsarvaṃ pitṝṇāṃ hi prasādataḥ .. 12 ..
Shloka 13
श्राद्धानि चैव कुर्वन्ति फलकामास्सदा नरा ॥ अभिसंधाय पितरं पितुश्च पितरं तथा ॥ १३ ॥
śrāddhāni caiva kurvanti phalakāmāssadā narā .. abhisaṃdhāya pitaraṃ pituśca pitaraṃ tathā .. 13 ..
Shloka 14
पितुः पितामहश्चैव त्रिषु पिंडेषु नित्यदा ॥ पितरो धर्मकामस्य प्रजाकामस्य च प्रजाम् ॥ १४ ॥
pituḥ pitāmahaścaiva triṣu piṃḍeṣu nityadā .. pitaro dharmakāmasya prajākāmasya ca prajām .. 14 ..
Shloka 15
पुष्टिकामस्य पुष्टिं च प्रयच्छन्ति युधिष्ठिर॥१५॥
puṣṭikāmasya puṣṭiṃ ca prayacchanti yudhiṣṭhira..15..
Shloka 16
युधिष्ठिर उवाच।।
वर्तंते पितरः स्वर्गे केषांचिन्नरके पुनः॥प्राणिनां नियतं चापि कर्मजं फलमुच्यते ॥ १६॥
vartaṃte pitaraḥ svarge keṣāṃcinnarake punaḥ..prāṇināṃ niyataṃ cāpi karmajaṃ phalamucyate .. 16..
Shloka 17
तानि श्राद्धानि दत्तानि कथं गच्छन्ति वै पितॄन् ॥ कथं शक्तास्तमाहर्त्तुं नरकस्था फलं पुनः ॥ १७॥
tāni śrāddhāni dattāni kathaṃ gacchanti vai pitṝn .. kathaṃ śaktāstamāharttuṃ narakasthā phalaṃ punaḥ .. 17..
Shloka 18
देवा अपि पितॄन्स्वर्गे यजंत इति मे श्रुतम् ॥ एतदिच्छाम्यहं श्रोतुं विस्तरेण ब्रवीहि मे ॥ १८॥
devā api pitṝnsvarge yajaṃta iti me śrutam .. etadicchāmyahaṃ śrotuṃ vistareṇa bravīhi me .. 18..
Shloka 19
भीष्म उवाच ।।
अत्र ते कीर्तयिष्यामि यथा श्रुतमरिन्दम ॥ पित्रा मम पुरा गीतं लोकान्तरगतेन वै ॥ १९॥
atra te kīrtayiṣyāmi yathā śrutamarindama .. pitrā mama purā gītaṃ lokāntaragatena vai .. 19..
Shloka 20
श्राद्धकाले मम पितुर्मया पिंडस्समुद्यतः ॥ मत्पिता मम हस्तेन भित्त्वा भूमिमयाचत ॥ 5.40.२०॥
śrāddhakāle mama piturmayā piṃḍassamudyataḥ .. matpitā mama hastena bhittvā bhūmimayācata .. 5.40.20..
Shloka 21
नैष कल्पविधिर्दृष्ट इति निश्चित्य चाप्यहम् ॥ कुशेष्वेव ततः पिंडं दत्तवानविचारयन् ॥ २१॥
naiṣa kalpavidhirdṛṣṭa iti niścitya cāpyaham .. kuśeṣveva tataḥ piṃḍaṃ dattavānavicārayan .. 21..
Shloka 22
ततः पिता मे संतुष्टो वाचा मधुरया तदा ॥ उवाच भारतश्रेष्ठ प्रीयमाणो मयानघ ॥ २२॥
tataḥ pitā me saṃtuṣṭo vācā madhurayā tadā .. uvāca bhārataśreṣṭha prīyamāṇo mayānagha .. 22..
Shloka 23
त्वया दायादवानस्मि धर्मज्ञेन विपश्चिता ॥ तारितोहं तु जिज्ञासा कृता मे पुरुषोत्तम ॥ २३॥
tvayā dāyādavānasmi dharmajñena vipaścitā .. tāritohaṃ tu jijñāsā kṛtā me puruṣottama .. 23..
Shloka 24
प्रमाणं यद्धि कुरुते धर्माचारेण पार्थिवः ॥ प्रजास्तदनु वर्तंते प्रमाणाचरितं सदा ॥ २४ ॥
pramāṇaṃ yaddhi kurute dharmācāreṇa pārthivaḥ .. prajāstadanu vartaṃte pramāṇācaritaṃ sadā .. 24 ..
Shloka 25
शृणु त्वं भारतश्रेष्ठ वेदधर्मांश्च शाश्वतान् ॥ प्रमाणं वेदधर्मस्य पुत्र निर्वर्त्तितं त्वया ॥ २५ ॥
śṛṇu tvaṃ bhārataśreṣṭha vedadharmāṃśca śāśvatān .. pramāṇaṃ vedadharmasya putra nirvarttitaṃ tvayā .. 25 ..
Shloka 26
तस्मात्तवाहं सुप्रीतः प्रीत्या वरमनुत्तमम् ॥ ददामि त्वं प्रतीक्षस्व त्रिषु लोकेषु दुर्लभम् ॥ २६॥
tasmāttavāhaṃ suprītaḥ prītyā varamanuttamam .. dadāmi tvaṃ pratīkṣasva triṣu lokeṣu durlabham .. 26..
Shloka 27
न ते प्रभविता मृत्युर्यावज्जीवितुमिच्छसि ॥ त्वत्तोभ्यनुज्ञां संप्राप्य मृत्युः प्रभविता पुनः ॥ २७॥
na te prabhavitā mṛtyuryāvajjīvitumicchasi .. tvattobhyanujñāṃ saṃprāpya mṛtyuḥ prabhavitā punaḥ .. 27..
Shloka 28
किं वा ते प्रार्थितं भूयो ददामि वरमुत्तमम् ॥ तद् ब्रूहि भरतश्रेष्ठ यत्ते मनसि वर्तते ॥ २८॥
kiṃ vā te prārthitaṃ bhūyo dadāmi varamuttamam .. tad brūhi bharataśreṣṭha yatte manasi vartate .. 28..
Shloka 29
इत्युक्तवति तस्मिंस्तु अभिवाद्य कृताञ्जलिः ॥ अवोचं कृतकृत्योऽहं प्रसन्ने त्वयि मानद॥प्रश्नं पृच्छामि वै कंचिद्वाच्यस्स भवता स्वयम् ॥ २९॥
ityuktavati tasmiṃstu abhivādya kṛtāñjaliḥ .. avocaṃ kṛtakṛtyo'haṃ prasanne tvayi mānada..praśnaṃ pṛcchāmi vai kaṃcidvācyassa bhavatā svayam .. 29..
Shloka 30
स मामुवाच तद् ब्रूहि यदीच्छसि ददामि ते ॥ इत्युक्तेथ मया तत्र पृष्टः प्रोवाच तन्नृपः॥5.40.३०॥
sa māmuvāca tad brūhi yadīcchasi dadāmi te .. ityuktetha mayā tatra pṛṣṭaḥ provāca tannṛpaḥ..5.40.30..
Shloka 31
शंतनुरुवाच ।।
शृणु तात प्रवक्ष्यामि प्रश्नं तेऽहं यथार्थतः ॥ पितृकल्पं च निखिलं मार्कण्डेयेन मे श्रुतम् ॥ ३१॥
śṛṇu tāta pravakṣyāmi praśnaṃ te'haṃ yathārthataḥ .. pitṛkalpaṃ ca nikhilaṃ mārkaṇḍeyena me śrutam .. 31..
Shloka 32
यत्त्वं पृच्छसि मां तात तदेवाहं महामुनिम् ॥ मार्कण्डेयमपृच्छं हि स मां प्रोवाच धर्मवित् ॥ ३२ ॥
yattvaṃ pṛcchasi māṃ tāta tadevāhaṃ mahāmunim .. mārkaṇḍeyamapṛcchaṃ hi sa māṃ provāca dharmavit .. 32 ..
Shloka 33
मार्कण्डेय उवाच ।।
शृणु राजन्मया दृष्टं कदाचित्पश्यता दिवम् ॥ विमानं महादायांतमन्तरेण गिरेस्तदा ॥ ३३॥
śṛṇu rājanmayā dṛṣṭaṃ kadācitpaśyatā divam .. vimānaṃ mahādāyāṃtamantareṇa girestadā .. 33..
Shloka 34
तस्मिन्विमाने पर्यक्षं ज्वलितांगारवर्चसम् ॥ महातेजः प्रज्वलंतं निर्विशेषं मनोहरम् ॥ ३४ ॥
tasminvimāne paryakṣaṃ jvalitāṃgāravarcasam .. mahātejaḥ prajvalaṃtaṃ nirviśeṣaṃ manoharam .. 34 ..
Shloka 35
अपश्यं चैव तत्राहं शयानं दीप्ततेजसम् ॥ अंगुष्ठमात्रं पुरुषमग्नावग्निमिवाहितम् ॥ ३५ ॥
apaśyaṃ caiva tatrāhaṃ śayānaṃ dīptatejasam .. aṃguṣṭhamātraṃ puruṣamagnāvagnimivāhitam .. 35 ..
Shloka 36
सोऽहं तस्मै नमः कृत्वा प्रणम्य शिरसा प्रभुम् ॥ अपृच्छं चैव तमहं विद्यामस्त्वां कथं विभो ॥ ३६ ॥
so'haṃ tasmai namaḥ kṛtvā praṇamya śirasā prabhum .. apṛcchaṃ caiva tamahaṃ vidyāmastvāṃ kathaṃ vibho .. 36 ..
Shloka 37
मामुवाच धर्मात्मा तेन तद्विद्यते तपः ॥ येन त्वं बुध्यसे मां हि मुने वै ब्रह्मणस्सुतम् ॥ ३७॥
māmuvāca dharmātmā tena tadvidyate tapaḥ .. yena tvaṃ budhyase māṃ hi mune vai brahmaṇassutam .. 37..
Shloka 38
सनत्कुमारमिति मां विद्धि किं करवाणि ते ॥ ये त्वन्ये ब्रह्मणः पुत्राः कनीयांसस्तु ते मम ॥ ३८॥
sanatkumāramiti māṃ viddhi kiṃ karavāṇi te .. ye tvanye brahmaṇaḥ putrāḥ kanīyāṃsastu te mama .. 38..
Shloka 39
भ्रातरस्सप्त दुर्धर्षा येषां वंशाः प्रतिष्ठिताः ॥ वयं तु यतिधर्माणस्संयम्यात्मानमात्मनि॥ ॥ ३९ ॥
bhrātarassapta durdharṣā yeṣāṃ vaṃśāḥ pratiṣṭhitāḥ .. vayaṃ tu yatidharmāṇassaṃyamyātmānamātmani.. .. 39 ..
Shloka 40
यथोत्पन्नस्तथैवाहं कुमार इति विश्रुतः ॥ तस्मात्सनत्कुमारं मे नामैतत्कथितं मुने ॥ 5.40.४० ॥
yathotpannastathaivāhaṃ kumāra iti viśrutaḥ .. tasmātsanatkumāraṃ me nāmaitatkathitaṃ mune .. 5.40.40 ..
Shloka 41
यद्भक्त्या ते तपश्चीर्णं मम दर्शनकांक्षया ॥ एष दृष्टोऽस्मि भद्रं ते कं कामं करवाणि ते ॥ ४१॥
yadbhaktyā te tapaścīrṇaṃ mama darśanakāṃkṣayā .. eṣa dṛṣṭo'smi bhadraṃ te kaṃ kāmaṃ karavāṇi te .. 41..
Shloka 42
इत्युक्तवन्तं तं चाहं प्रावोचं त्वं शृणु प्रभो ॥ पितॄणामादिसर्गं च कथयस्व यथातथम् ॥ ४२॥
ityuktavantaṃ taṃ cāhaṃ prāvocaṃ tvaṃ śṛṇu prabho .. pitṝṇāmādisargaṃ ca kathayasva yathātatham .. 42..
Shloka 43
इत्युक्तस्स तु मां प्राह शृणु सर्वं यथातथम् ॥ वच्मि ते तत्त्वतस्तात पितृसर्गं शुभावहम् ॥ ४३॥
ityuktassa tu māṃ prāha śṛṇu sarvaṃ yathātatham .. vacmi te tattvatastāta pitṛsargaṃ śubhāvaham .. 43..
Shloka 44
सनत्कुमार उवाच ।।
देवान्पुरासृजद्ब्रह्मा मां यक्षध्वं स चाह तान् ॥ तमुत्सृज्य तमात्मानमयजंस्ते फलार्थिनः ॥ ४४॥
devānpurāsṛjadbrahmā māṃ yakṣadhvaṃ sa cāha tān .. tamutsṛjya tamātmānamayajaṃste phalārthinaḥ .. 44..
Shloka 45
ते शप्ता ब्रह्मणा मूढा नष्टसंज्ञा भविष्यथ ॥ तस्मात्किंचिदजानंतो नष्टसंज्ञाः पितामहम् ॥ ४५॥
te śaptā brahmaṇā mūḍhā naṣṭasaṃjñā bhaviṣyatha .. tasmātkiṃcidajānaṃto naṣṭasaṃjñāḥ pitāmaham .. 45..
Shloka 46
प्रोचुस्तं प्रणतास्सर्वे कुरुष्वानुग्रहं हि नः ॥ इत्युक्तस्तानुवाचेदं प्रायश्चित्तार्थमेव हि॥४६॥
procustaṃ praṇatāssarve kuruṣvānugrahaṃ hi naḥ .. ityuktastānuvācedaṃ prāyaścittārthameva hi..46..
Shloka 47
पुत्रान्स्वान्परिपृच्छध्वं ततो ज्ञानमवाप्स्यथ॥इत्युक्ता नष्टसंज्ञास्ते पुत्रान्पप्रच्छुरोजसा ॥ ४७ ॥
putrānsvānparipṛcchadhvaṃ tato jñānamavāpsyatha..ityuktā naṣṭasaṃjñāste putrānpapracchurojasā .. 47 ..
Shloka 48
प्रायश्चित्तार्थमेवाधिलब्धसंज्ञा दिवौकसः॥गम्यतां पुत्रका एवं पुत्रैरुक्ताश्च तेऽनघ॥४८॥
prāyaścittārthamevādhilabdhasaṃjñā divaukasaḥ..gamyatāṃ putrakā evaṃ putrairuktāśca te'nagha..48..
Shloka 49
अभिशप्तास्तु ते देवाः पुत्रकामेन वेधसम्॥पप्रच्छुरुक्ताः पुत्रैस्ते गतास्ते पुत्रका इति ॥ ४९॥
abhiśaptāstu te devāḥ putrakāmena vedhasam..papracchuruktāḥ putraiste gatāste putrakā iti .. 49..
Shloka 50
ततस्तानब्रवीद्देवो देवान्ब्रह्मा ससंशयान् ॥ शृणुध्वं निर्जरास्सर्वे यूयं न ब्रह्मवादिनः ॥ 5.40.५०॥
tatastānabravīddevo devānbrahmā sasaṃśayān .. śṛṇudhvaṃ nirjarāssarve yūyaṃ na brahmavādinaḥ .. 5.40.50..
Shloka 51
तस्माद्यदुक्तं युष्माकं पुत्रैस्तैर्ज्ञानिसत्तमैः ॥ मंतव्यं संशयं त्यक्त्वा तथा न च तदन्यथा ॥ ५१॥
tasmādyaduktaṃ yuṣmākaṃ putraistairjñānisattamaiḥ .. maṃtavyaṃ saṃśayaṃ tyaktvā tathā na ca tadanyathā .. 51..
Shloka 52
देवाश्च पितरश्चैव यजध्वं त्रिदिवौकसः ॥ परस्परं महाप्रीत्या सर्वकामफलप्रदा॥५२॥
devāśca pitaraścaiva yajadhvaṃ tridivaukasaḥ .. parasparaṃ mahāprītyā sarvakāmaphalapradā..52..
Shloka 53
ततस्ते छिन्नसंदेहाः प्रीतिमंतः परस्परम् ॥ बभूवुर्मुनिशार्दूल ब्रह्मवाक्यात्सुखप्रदाः ॥ ५३ ॥
tataste chinnasaṃdehāḥ prītimaṃtaḥ parasparam .. babhūvurmuniśārdūla brahmavākyātsukhapradāḥ .. 53 ..
Shloka 54
सनत्कुमार उवाच ।।
ततो देवा हि प्रोचुस्तान्यदुक्ताः पुत्रका वयम्॥तस्माद्भवंतः पितरो भविष्यथ न संशयः ॥ ५४॥
tato devā hi procustānyaduktāḥ putrakā vayam..tasmādbhavaṃtaḥ pitaro bhaviṣyatha na saṃśayaḥ .. 54..
Shloka 55
पितृश्राद्धे क्रियां कश्चित्करिष्यति न संशयः ॥ श्राद्धैराप्यायितस्सोमो लोकानाप्याययिष्यति ॥ ५५॥
pitṛśrāddhe kriyāṃ kaścitkariṣyati na saṃśayaḥ .. śrāddhairāpyāyitassomo lokānāpyāyayiṣyati .. 55..
Shloka 56
समुद्रं पर्वतवनं जंगमाजंगमैर्वृतम्॥श्राद्धानि पुष्टिकामैश्च ये करिष्यंति मानवाः॥५६॥
samudraṃ parvatavanaṃ jaṃgamājaṃgamairvṛtam..śrāddhāni puṣṭikāmaiśca ye kariṣyaṃti mānavāḥ..56..
Shloka 57
तेभ्यः पुष्टिप्रदाश्चैव पितरः प्रीणितास्सदा ॥ श्राद्धे ये च प्रदास्यंति त्रीन्पिंडान्नामगोत्रतः ॥ ५७ ॥
tebhyaḥ puṣṭipradāścaiva pitaraḥ prīṇitāssadā .. śrāddhe ye ca pradāsyaṃti trīnpiṃḍānnāmagotrataḥ .. 57 ..
Shloka 58
सर्वत्र वर्तमानास्ते पितरः प्रपितामहाः ॥ भावयिष्यंति सततं श्राद्धदानेन तर्पिताः ॥ ५८ ॥
sarvatra vartamānāste pitaraḥ prapitāmahāḥ .. bhāvayiṣyaṃti satataṃ śrāddhadānena tarpitāḥ .. 58 ..
Shloka 59
इति तद्वचनं सत्यं भवत्वथ दिवौकसः ॥ पुत्राश्च पितरश्चैव वयं सर्वे परस्परम् ॥ ५९॥
iti tadvacanaṃ satyaṃ bhavatvatha divaukasaḥ .. putrāśca pitaraścaiva vayaṃ sarve parasparam .. 59..
Shloka 60
एवं ते पितरो देवा धर्मतः पुत्रतां गताः ॥ अन्योन्यं पितरो वै ते प्रथिताः क्षितिमण्डले॥5.40.६०॥
evaṃ te pitaro devā dharmataḥ putratāṃ gatāḥ .. anyonyaṃ pitaro vai te prathitāḥ kṣitimaṇḍale..5.40.60..
Shloka 61
इति श्रीशिवमहापुराणे पञ्चम्यामुमासंहितायां श्राद्धकल्पे पितृप्रभाववर्णनंनाम चत्वारिंशोऽध्यायः ॥ ४०॥
iti śrīśivamahāpurāṇe pañcamyāmumāsaṃhitāyāṃ śrāddhakalpe pitṛprabhāvavarṇanaṃnāma catvāriṃśo'dhyāyaḥ .. 40..

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In