Gyaandweep | Shiva Purana Uma Samhita, Adhyaya 43

शौनक उवाच ।।

आचार्य्यपूजनं ब्रूहि सूत व्यासगुरोऽधुना ।। ग्रन्थस्य श्रवणान्ते हि किं कर्तव्यं तदप्यहो ।। १ ।।

ācāryyapūjanaṃ brūhi sūta vyāsaguro'dhunā || granthasya śravaṇānte hi kiṃ kartavyaṃ tadapyaho || 1 ||

सूत उवाच ।।

पूजयेद्विधिवद्भक्त्याचार्य्यं श्रुत्वा कथां पराम् ।। ग्रन्थान्ते विधिवद्दद्यादाचार्य्याय प्रसन्नधीः ।। २।।

pūjayedvidhivadbhaktyācāryyaṃ śrutvā kathāṃ parām || granthānte vidhivaddadyādācāryyāya prasannadhīḥ || 2||

ततो वक्तारमानम्य संपूज्य च यथाविधि ।। भूषणैर्हस्तकर्णानां वस्त्रैस्सौम्यादिभिस्सुधीः ।। ३।।

tato vaktāramānamya saṃpūjya ca yathāvidhi || bhūṣaṇairhastakarṇānāṃ vastraissaumyādibhissudhīḥ || 3||

शिवपूजासमाप्तौ तु दद्याद्धेनुं सवत्सिकाम् ।। कृत्वासनं सुवर्णस्य पलमानस्य साम्बरम् ।। ४ ।।

śivapūjāsamāptau tu dadyāddhenuṃ savatsikām || kṛtvāsanaṃ suvarṇasya palamānasya sāmbaram || 4 ||

तत्रास्थाप्य शुभं ग्रंथं लिखितं ललिताक्षरैः ।। आचार्याय सुधीर्दद्यान्मुक्तः स्याद्भवबन्धनैः ।। ५ ।।

tatrāsthāpya śubhaṃ graṃthaṃ likhitaṃ lalitākṣaraiḥ || ācāryāya sudhīrdadyānmuktaḥ syādbhavabandhanaiḥ || 5 ||

ग्रामो गजो हयश्चापि यथाशक्त्यपराणि च ।। मुने सर्वाणि देयानि वाचकाय महात्मने ।। ६ ।।

grāmo gajo hayaścāpi yathāśaktyaparāṇi ca || mune sarvāṇi deyāni vācakāya mahātmane || 6 ||

विधानसहितं सम्यक्छतं हि सफलं स्मृतम् ।। पुराणं शौनकमुने सत्यमेवोदितं मया ।। ७ ।।

vidhānasahitaṃ samyakchataṃ hi saphalaṃ smṛtam || purāṇaṃ śaunakamune satyamevoditaṃ mayā || 7 ||

तस्माद्विधानदुक्तं तु शृणुयाद्भक्तितो मुने ।। पुराणं निगमार्थाढ्यं पुण्यदं हृदयं श्रुतेः ।। ८ ।।

tasmādvidhānaduktaṃ tu śṛṇuyādbhaktito mune || purāṇaṃ nigamārthāḍhyaṃ puṇyadaṃ hṛdayaṃ śruteḥ || 8 ||

इति श्रीशिवमहापुराणे पञ्चम्यामुमासंहितातायां व्यासपूजनप्रकारो नाम त्रिचत्वारिंशोऽध्यायः ।। ४३।।

iti śrīśivamahāpurāṇe pañcamyāmumāsaṃhitātāyāṃ vyāsapūjanaprakāro nāma tricatvāriṃśo'dhyāyaḥ || 43||

Languages