वायुरुवाच॥
अथ देवो महादेवो महाजलदनादया ॥ वाचा मधुरगंभीरशिवदश्लक्ष्णवर्णया ॥ 1॥ ॥ ७.१,१६.१ ॥
atha devo mahādevo mahājaladanādayā || vācā madhuragaṃbhīraśivadaślakṣṇavarṇayā || 1|| || 7.1,16.1 ||
अर्थसंपन्नपदया राजलक्षणयुक्तया ॥ अशेषविषयारंभरक्षाविमलदक्षया ॥ 2॥ ॥ ७.१,१६.२ ॥
arthasaṃpannapadayā rājalakṣaṇayuktayā || aśeṣaviṣayāraṃbharakṣāvimaladakṣayā || 2|| || 7.1,16.2 ||
मनोहरतरोदारमधुरस्मितपूर्वया ॥ संबभाषे सुसंपीतो विश्वकर्माणमीश्वरः ॥ 3॥ ॥ ७.१,१६.३ ॥
manoharatarodāramadhurasmitapūrvayā || saṃbabhāṣe susaṃpīto viśvakarmāṇamīśvaraḥ || 3|| || 7.1,16.3 ||
ईश्वर उवाच॥
वत्स वत्स महाभाग मम पुत्र पितामह ॥ ज्ञातमेव मया सर्वं तव वाक्यस्य गौरवम् ॥ 4॥ ॥ ७.१,१६.४ ॥
vatsa vatsa mahābhāga mama putra pitāmaha || jñātameva mayā sarvaṃ tava vākyasya gauravam || 4|| || 7.1,16.4 ||
प्रजानामेव बृद्ध्यर्थं तपस्तप्तं त्वयाधुना ॥ तपसा ऽनेन तुष्टोस्मि ददामि च तवेप्सितम् ॥ 5॥ ॥ ७.१,१६.५ ॥
prajānāmeva bṛddhyarthaṃ tapastaptaṃ tvayādhunā || tapasā 'nena tuṣṭosmi dadāmi ca tavepsitam || 5|| || 7.1,16.5 ||
इत्युक्त्वा परमोदारं स्वभावमधुरं वचः ॥ ससर्ज वपुषो भागाद्देवीं देववरो हरः ॥ 6॥ ॥ ७.१,१६.६ ॥
ityuktvā paramodāraṃ svabhāvamadhuraṃ vacaḥ || sasarja vapuṣo bhāgāddevīṃ devavaro haraḥ || 6|| || 7.1,16.6 ||
यामाहुर्ब्रह्मविद्वांसो देवीं दिव्यगुणान्विताम् ॥ परस्य परमां शक्तिं भवस्य परमात्मनः ॥ 7॥ ॥ ७.१,१६.७ ॥
yāmāhurbrahmavidvāṃso devīṃ divyaguṇānvitām || parasya paramāṃ śaktiṃ bhavasya paramātmanaḥ || 7|| || 7.1,16.7 ||
यस्यां न खलु विद्यंते जन्म मृत्युजरादयः ॥ या भवानी भवस्यांगात्समाविरभवत्किल ॥ 8॥ ॥ ७.१,१६.८ ॥
yasyāṃ na khalu vidyaṃte janma mṛtyujarādayaḥ || yā bhavānī bhavasyāṃgātsamāvirabhavatkila || 8|| || 7.1,16.8 ||
यस्या वाचो निवर्तन्ते मनसा चेंद्रियैः सह ॥ सा भर्तुर्वपुषो भागाज्जातेव समदृश्यत ॥ 9॥ ॥ ७.१,१६.९ ॥
yasyā vāco nivartante manasā ceṃdriyaiḥ saha || sā bharturvapuṣo bhāgājjāteva samadṛśyata || 9|| || 7.1,16.9 ||
या सा जगदिदं कृत्स्नं महिम्ना व्याप्य तिष्ठति ॥ शरीरिणीव स देवी विचित्रं समलक्ष्यत ॥ 10॥ ॥ ७.१,१६.१० ॥
yā sā jagadidaṃ kṛtsnaṃ mahimnā vyāpya tiṣṭhati || śarīriṇīva sa devī vicitraṃ samalakṣyata || 10|| || 7.1,16.10 ||
सर्वं जगदिदं चैषा संमोहयति मायया ॥ ईश्वरात्सैव जाताभूदजाता परमार्थतः ॥ 11॥ ॥ ७.१,१६.११ ॥
sarvaṃ jagadidaṃ caiṣā saṃmohayati māyayā || īśvarātsaiva jātābhūdajātā paramārthataḥ || 11|| || 7.1,16.11 ||
न यस्या परमो भावः सुराणामपि गोचरः ॥ विश्वामरेश्वरी चैव विभक्ता भर्तुरंगतः ॥ 12॥ ॥ ७.१,१६.१२ ॥
na yasyā paramo bhāvaḥ surāṇāmapi gocaraḥ || viśvāmareśvarī caiva vibhaktā bharturaṃgataḥ || 12|| || 7.1,16.12 ||
तां दृष्ट्वा परमेशानीं सर्वलोकमहेश्वरीम् ॥ सर्वज्ञां सर्वगां सूक्ष्मां सदसद्व्यक्तिवर्जिताम् ॥ 13॥ ॥ ७.१,१६.१३ ॥
tāṃ dṛṣṭvā parameśānīṃ sarvalokamaheśvarīm || sarvajñāṃ sarvagāṃ sūkṣmāṃ sadasadvyaktivarjitām || 13|| || 7.1,16.13 ||
परमां निखिलं भासा भासयन्तीमिदं जगत् ॥ प्रणिपत्य महादेवीं प्रार्थयामास वै विराट् ॥ 14॥ ॥ ७.१,१६.१४ ॥
paramāṃ nikhilaṃ bhāsā bhāsayantīmidaṃ jagat || praṇipatya mahādevīṃ prārthayāmāsa vai virāṭ || 14|| || 7.1,16.14 ||
ब्रह्मोवाच॥
देवि देवेन सृष्टो ऽहमादौ सर्वजगन्मयि ॥ प्रजासर्गे नियुक्तश्च सृजामि सकलं जगत् ॥ 15॥ ॥ ७.१,१६.१५ ॥
devi devena sṛṣṭo 'hamādau sarvajaganmayi || prajāsarge niyuktaśca sṛjāmi sakalaṃ jagat || 15|| || 7.1,16.15 ||
मनसा निर्मिताः सर्वे देवि देवादयो मया ॥ न वृद्धिमुपगच्छन्ति सृज्यमानाः पुनः पुनः ॥ 16॥ ॥ ७.१,१६.१६ ॥
manasā nirmitāḥ sarve devi devādayo mayā || na vṛddhimupagacchanti sṛjyamānāḥ punaḥ punaḥ || 16|| || 7.1,16.16 ||
मिथुनप्रभवामेव कृत्वा सृष्टिमतः परम् ॥ संवर्धयितुमिच्छामि सर्वा एव मम प्रजाः ॥ 17॥ ॥ ७.१,१६.१७ ॥
mithunaprabhavāmeva kṛtvā sṛṣṭimataḥ param || saṃvardhayitumicchāmi sarvā eva mama prajāḥ || 17|| || 7.1,16.17 ||
न निर्गतं पुरा त्वत्तो नारीणां कुलमव्ययम् ॥ तेन नारीकुलं स्रष्टुं शक्तिर्मम न विद्यते ॥ 18॥ ॥ ७.१,१६.१८ ॥
na nirgataṃ purā tvatto nārīṇāṃ kulamavyayam || tena nārīkulaṃ sraṣṭuṃ śaktirmama na vidyate || 18|| || 7.1,16.18 ||
सर्वासामेव शक्तीनां त्वत्तः खलु समुद्भवः ॥ तस्मात्सर्वत्र सर्वेषां सर्वशक्तिप्रदायिनीम् ॥ 19॥ ॥ ७.१,१६.१९ ॥
sarvāsāmeva śaktīnāṃ tvattaḥ khalu samudbhavaḥ || tasmātsarvatra sarveṣāṃ sarvaśaktipradāyinīm || 19|| || 7.1,16.19 ||
त्वामेव वरदां मायां प्रार्थयामि सुरेश्वरीम् ॥ चराचरविवृद्ध्यर्थमंशेनैकेन सर्वगे ॥ 20॥ ॥ ७.१,१६.२० ॥
tvāmeva varadāṃ māyāṃ prārthayāmi sureśvarīm || carācaravivṛddhyarthamaṃśenaikena sarvage || 20|| || 7.1,16.20 ||
दक्षस्य मम पुत्रस्य पुत्री भव भवार्दिनि ॥ एवं सा याचिता देवी ब्रह्मणा ब्रह्मयोनिना ॥ 21॥ ॥ ७.१,१६.२१ ॥
dakṣasya mama putrasya putrī bhava bhavārdini || evaṃ sā yācitā devī brahmaṇā brahmayoninā || 21|| || 7.1,16.21 ||
शक्तिमेकां भ्रुवोर्मध्यात्ससर्जात्मसमप्रभाम् ॥ तामाह प्रहसन्प्रेक्ष्य देवदेववरो हरः ॥ 22॥ ॥ ७.१,१६.२२ ॥
śaktimekāṃ bhruvormadhyātsasarjātmasamaprabhām || tāmāha prahasanprekṣya devadevavaro haraḥ || 22|| || 7.1,16.22 ||
ब्रह्माणं तपसाराध्य कुरु तस्य यथेप्सितम् ॥ तामाज्ञां परमेशस्य शिरसा प्रतिगृह्य सा ॥ 23॥ ॥ ७.१,१६.२३ ॥
brahmāṇaṃ tapasārādhya kuru tasya yathepsitam || tāmājñāṃ parameśasya śirasā pratigṛhya sā || 23|| || 7.1,16.23 ||
ब्रह्मणो वचनाद्देवी दक्षस्य दुहिताभवत् ॥ दत्त्वैवमतुलां शक्तिं ब्रह्मणे ब्रह्मरूपिणीम् ॥ 24॥ ॥ ७.१,१६.२४ ॥
brahmaṇo vacanāddevī dakṣasya duhitābhavat || dattvaivamatulāṃ śaktiṃ brahmaṇe brahmarūpiṇīm || 24|| || 7.1,16.24 ||
विवेश देहं देवस्य देवश्चांतरधीयत ॥ तदा प्रभृति लोके ऽस्मिन् स्त्रियां भोगः प्रतिष्ठितः ॥ 25॥ ॥ ७.१,१६.२५ ॥
viveśa dehaṃ devasya devaścāṃtaradhīyata || tadā prabhṛti loke 'smin striyāṃ bhogaḥ pratiṣṭhitaḥ || 25|| || 7.1,16.25 ||
प्रजासृष्टिश्च विप्रेंद्रा मैथुनेन प्रवर्तते ॥ ब्रह्मापि प्राप सानन्दं सन्तोषं मुनिपुंगवाः ॥ 26॥ ॥ ७.१,१६.२६ ॥
prajāsṛṣṭiśca vipreṃdrā maithunena pravartate || brahmāpi prāpa sānandaṃ santoṣaṃ munipuṃgavāḥ || 26|| || 7.1,16.26 ||
एतद्वस्सर्वमाख्यातं देव्याः शक्तिसमुद्भवम् ॥ पुण्यवृद्धिकरं श्राव्यं भूतसर्गानुपंगतः ॥ 27॥ ॥ ७.१,१६.२७ ॥
etadvassarvamākhyātaṃ devyāḥ śaktisamudbhavam || puṇyavṛddhikaraṃ śrāvyaṃ bhūtasargānupaṃgataḥ || 27|| || 7.1,16.27 ||
य इदं कीर्तयेन्नित्यं देव्याः शक्तिसमुद्भवम् ॥ पुण्यं सर्वमवाप्नोति पुत्रांश्च लभते शुभान् ॥ 28॥ ॥ ७.१,१६.२८ ॥
ya idaṃ kīrtayennityaṃ devyāḥ śaktisamudbhavam || puṇyaṃ sarvamavāpnoti putrāṃśca labhate śubhān || 28|| || 7.1,16.28 ||
इति श्रीशिवमहापुराणे सप्तम्यां वायवीयसंहितायां पूर्वखण्डे देवीशक्त्युद्भवो नाम षोडशो ऽध्यायः॥ ॥ ७.१,१६.२९ ॥
iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe devīśaktyudbhavo nāma ṣoḍaśo 'dhyāyaḥ|| || 7.1,16.29 ||
ॐ श्री परमात्मने नमः
AnonymousUser
150
5 Days
Learn
Teach
Discuss
Dashboard
Verses & Playlist
Saved Flashcards
Saved Chants
Saved Discussions
Logout
Copy Shloka
Shloka Link
