Gyaandweep | Shiva Purana Vayaviya Samhita

ब्रहमोवाच॥

यतो वाचो निवर्तंते अप्राप्य मनसा सह ॥ आनंदं यस्य वै विद्वान्न बिभेति कुतश्चन ॥ ७.१,३.१॥

yato vāco nivartaṃte aprāpya manasā saha || ānaṃdaṃ yasya vai vidvānna bibheti kutaścana || 7.1,3.1||

यस्मात्सर्वमिदं ब्रह्मविष्णुरुद्रेन्द्रपूर्वकम् ॥ सह भूतेन्द्रियैः सर्वैः प्रथमं संप्रसूयते ॥ ७.१,३.२॥

yasmātsarvamidaṃ brahmaviṣṇurudrendrapūrvakam || saha bhūtendriyaiḥ sarvaiḥ prathamaṃ saṃprasūyate || 7.1,3.2||

कारणानां च यो धाता ध्याता परमकारणम् ॥ न संप्रसूयते ऽन्यस्मात्कुतश्चन कदाचन ॥ ७.१,३.३॥

kāraṇānāṃ ca yo dhātā dhyātā paramakāraṇam || na saṃprasūyate 'nyasmātkutaścana kadācana || 7.1,3.3||

सर्वैश्वर्येण संपन्नो नाम्ना सर्वेश्वरः स्वयम् ॥ सर्वैर्मुमुक्षुभिर्ध्येयश्शंभुराकाशमध्यगः ॥ ७.१,३.४॥

sarvaiśvaryeṇa saṃpanno nāmnā sarveśvaraḥ svayam || sarvairmumukṣubhirdhyeyaśśaṃbhurākāśamadhyagaḥ || 7.1,3.4||

यो ऽग्रे मां विदधे पुत्रं ज्ञानं च प्रहिणोति मे ॥ तत्प्रसादान्मयालब्धं प्राजापत्यमिदं पदम् ॥ ७.१,३.५॥

yo 'gre māṃ vidadhe putraṃ jñānaṃ ca prahiṇoti me || tatprasādānmayālabdhaṃ prājāpatyamidaṃ padam || 7.1,3.5||

ईशो वृक्ष इव स्तब्धो य एको दिवि तिष्ठति ॥ येनेदमखिलं पूर्णं पुरुषेण महात्मना ॥ ७.१,३.६॥

īśo vṛkṣa iva stabdho ya eko divi tiṣṭhati || yenedamakhilaṃ pūrṇaṃ puruṣeṇa mahātmanā || 7.1,3.6||

एको बहूनां जंतूनां निष्क्रियाणां च सक्रियः ॥ य एको बहुधा बीजं करोति स महेश्वरः ॥ ७.१,३.७॥

eko bahūnāṃ jaṃtūnāṃ niṣkriyāṇāṃ ca sakriyaḥ || ya eko bahudhā bījaṃ karoti sa maheśvaraḥ || 7.1,3.7||

जीवैरेभिरिमांल्लोकान्सर्वानीशो य ईशते ॥ य एको भागवान्रुद्रो न द्वितीयो ऽस्ति कश्चन ॥ ७.१,३.८॥

jīvairebhirimāṃllokānsarvānīśo ya īśate || ya eko bhāgavānrudro na dvitīyo 'sti kaścana || 7.1,3.8||

सदा जनानां हृदये संनिविष्टो ऽपि यः परैः ॥ अलक्ष्यो लक्षयन्विश्वमधितिष्ठति सर्वदा ॥ ७.१,३.९॥

sadā janānāṃ hṛdaye saṃniviṣṭo 'pi yaḥ paraiḥ || alakṣyo lakṣayanviśvamadhitiṣṭhati sarvadā || 7.1,3.9||

यस्तु कालात्प्रमुक्तानि कारणान्यखिलान्यपि ॥ अनन्तशक्तिरेवैको भगवानधितिष्ठति ॥ ७.१,३.१०॥

yastu kālātpramuktāni kāraṇānyakhilānyapi || anantaśaktirevaiko bhagavānadhitiṣṭhati || 7.1,3.10||

न यस्य दिवसो रात्रिर्न समानो न चाधिकः ॥ स्वभाविकी पराशक्तिर्नित्या ज्ञानक्रिये अपि ॥ ७.१,३.११॥

na yasya divaso rātrirna samāno na cādhikaḥ || svabhāvikī parāśaktirnityā jñānakriye api || 7.1,3.11||

यदिदं क्षरमव्यक्तं यदप्यमृतमक्षरम् ॥ तावुभावक्षरात्मानावेको देवः स्वयं हरः ॥ ७.१,३.१२॥

yadidaṃ kṣaramavyaktaṃ yadapyamṛtamakṣaram || tāvubhāvakṣarātmānāveko devaḥ svayaṃ haraḥ || 7.1,3.12||

ईशते तदभिध्यानाद्योजनासत्त्वभावनः ॥ भूयो ह्यस्य पशोरन्ते विश्वमाया निवर्तते ॥ ७.१,३.१३॥

īśate tadabhidhyānādyojanāsattvabhāvanaḥ || bhūyo hyasya paśorante viśvamāyā nivartate || 7.1,3.13||

यस्मिन्न भासते विद्युन्न सूर्यो न च चन्द्रमाः ॥ यस्य भासा विभातीदमित्येषा शाश्वती श्रुतिः ॥ ७.१,३.१४॥

yasminna bhāsate vidyunna sūryo na ca candramāḥ || yasya bhāsā vibhātīdamityeṣā śāśvatī śrutiḥ || 7.1,3.14||

एको देवो महादेवो विज्ञेयस्तु महेश्वरः ॥ न तस्य परमं किंचित्पदं समधिगम्यते ॥ ७.१,३.१५॥

eko devo mahādevo vijñeyastu maheśvaraḥ || na tasya paramaṃ kiṃcitpadaṃ samadhigamyate || 7.1,3.15||

अयमादिरनाद्यन्तस्स्वभावादेव निर्मलः ॥ स्वतन्त्रः परिपूर्णश्च स्वेच्छाधीनश्चराचरः ॥ ७.१,३.१६॥

ayamādiranādyantassvabhāvādeva nirmalaḥ || svatantraḥ paripūrṇaśca svecchādhīnaścarācaraḥ || 7.1,3.16||

अप्राकृतवपुः श्रीमांल्लक्ष्यलक्षणवर्जितः ॥ अयं मुक्तो मोचकश्च ह्यकालः कालचोदकः ॥ ७.१,३.१७॥

aprākṛtavapuḥ śrīmāṃllakṣyalakṣaṇavarjitaḥ || ayaṃ mukto mocakaśca hyakālaḥ kālacodakaḥ || 7.1,3.17||

सर्वोपरिकृतावासस्सर्वावासश्च सर्ववित् ॥ षड्विधाध्वमयस्यास्य सर्वस्य जगतः पतिः ॥ ७.१,३.१८॥

sarvoparikṛtāvāsassarvāvāsaśca sarvavit || ṣaḍvidhādhvamayasyāsya sarvasya jagataḥ patiḥ || 7.1,3.18||

उत्तरोत्तरभूतानामुत्तरश्च निरुत्तरः ॥ अनन्तानन्तसन्दोहमकरंदमधुव्रतः ॥ ७.१,३.१९॥

uttarottarabhūtānāmuttaraśca niruttaraḥ || anantānantasandohamakaraṃdamadhuvrataḥ || 7.1,3.19||

अखंडजगदंडानां पिंडीकरणपंडितः ॥ औदार्यवीर्यगांभीर्यमाधुर्यमकरालयः ॥ ७.१,३.२०॥

akhaṃḍajagadaṃḍānāṃ piṃḍīkaraṇapaṃḍitaḥ || audāryavīryagāṃbhīryamādhuryamakarālayaḥ || 7.1,3.20||

नैवास्य सदृशं वस्तु नाधिकं चापि किंचन ॥ अतुलः सर्वभूतानां राजराजश्च तिष्ठति ॥ ७.१,३.२१॥

naivāsya sadṛśaṃ vastu nādhikaṃ cāpi kiṃcana || atulaḥ sarvabhūtānāṃ rājarājaśca tiṣṭhati || 7.1,3.21||

अनेन चित्रकृत्येन प्रथमं सृज्यते जगत् ॥ अंतकाले पुनश्चेदं तस्मिन्प्रलयमेष्यते ॥ ७.१,३.२२॥

anena citrakṛtyena prathamaṃ sṛjyate jagat || aṃtakāle punaścedaṃ tasminpralayameṣyate || 7.1,3.22||

अस्य भूतानि वश्यानि अयं सर्वनियोजकः ॥ अयं तु परया भक्त्या दृश्यते नान्यथा क्वचित् ॥ ७.१,३.२३॥

asya bhūtāni vaśyāni ayaṃ sarvaniyojakaḥ || ayaṃ tu parayā bhaktyā dṛśyate nānyathā kvacit || 7.1,3.23||

व्रतानि सर्वदानानि तपांसि नियमास्तथा ॥ कथितानि पुरा सद्भिर्भावार्थं नात्र संशयः ॥ ७.१,३.२४॥

vratāni sarvadānāni tapāṃsi niyamāstathā || kathitāni purā sadbhirbhāvārthaṃ nātra saṃśayaḥ || 7.1,3.24||

हरिश्चाहं च रुद्रश्च तथान्ये च सुरासुराः ॥ तपोभिरुग्रैरद्यापि तस्य दर्शनकांक्षिणः ॥ ७.१,३.२५॥

hariścāhaṃ ca rudraśca tathānye ca surāsurāḥ || tapobhirugrairadyāpi tasya darśanakāṃkṣiṇaḥ || 7.1,3.25||

अदृश्यः पतितैर्मूढैर्दुर्जनैरपि कुत्सितैः ॥ भक्तैरन्तर्बहिश्चापि पूज्यः संभाष्य एव च ॥ ७.१,३.२६॥

adṛśyaḥ patitairmūḍhairdurjanairapi kutsitaiḥ || bhaktairantarbahiścāpi pūjyaḥ saṃbhāṣya eva ca || 7.1,3.26||

तदिदं त्रिविधं रूपं स्थूलं सूक्ष्मं ततः परम् ॥ अस्मदाद्यमरैर्दृश्यं स्थूलं सूक्ष्मं तु योगिभिः ॥ ७.१,३.२७॥

tadidaṃ trividhaṃ rūpaṃ sthūlaṃ sūkṣmaṃ tataḥ param || asmadādyamarairdṛśyaṃ sthūlaṃ sūkṣmaṃ tu yogibhiḥ || 7.1,3.27||

ततः परं तु यन्नित्यं ज्ञानमानंदमव्ययम् ॥ तन्निष्ठैस्तत्परैर्भक्तैर्दृश्यं तद्व्रतमाश्रितैः ॥ ७.१,३.२८॥

tataḥ paraṃ tu yannityaṃ jñānamānaṃdamavyayam || tanniṣṭhaistatparairbhaktairdṛśyaṃ tadvratamāśritaiḥ || 7.1,3.28||

बहुनात्र किमुक्तेन गुह्याद्गुह्यतरं परम् ॥ शिवे भक्तिर्न सन्देहस्तया युक्तो विमुच्यते ॥ ७.१,३.२९॥

bahunātra kimuktena guhyādguhyataraṃ param || śive bhaktirna sandehastayā yukto vimucyate || 7.1,3.29||

प्रसादादेव सा भक्तिः प्रसादो भक्तिसंभवः ॥ यथा चांकुरतो बीजं बीजतो वा यथांकुरः ॥ ७.१,३.३०॥

prasādādeva sā bhaktiḥ prasādo bhaktisaṃbhavaḥ || yathā cāṃkurato bījaṃ bījato vā yathāṃkuraḥ || 7.1,3.30||

प्रसादपूर्विका एव पशोस्सर्वत्र सिद्धयः ॥ स एव साधनैरन्ते सर्वैरपि च साध्यते ॥ ७.१,३.३१॥

prasādapūrvikā eva paśossarvatra siddhayaḥ || sa eva sādhanairante sarvairapi ca sādhyate || 7.1,3.31||

प्रसादसाधनं धर्मस्स च वेदेन दर्शितः ॥ तदभ्यासवशात्साम्यं पूर्वयोः पुण्यपापयोः ॥ ७.१,३.३२॥

prasādasādhanaṃ dharmassa ca vedena darśitaḥ || tadabhyāsavaśātsāmyaṃ pūrvayoḥ puṇyapāpayoḥ || 7.1,3.32||

साम्यात्प्रसादसंपर्को धर्मस्यातिशयस्ततः ॥ धर्मातिशयमासाद्य पशोः पापपरिक्षयः ॥ ७.१,३.३३॥

sāmyātprasādasaṃparko dharmasyātiśayastataḥ || dharmātiśayamāsādya paśoḥ pāpaparikṣayaḥ || 7.1,3.33||

एवं प्रक्षीणपापस्य बहुभिर्जन्मभिः क्रमात् ॥ सांबे सर्वेश्वरे भक्तिर्ज्ञानपूर्वा प्रजायते ॥ ७.१,३.३४॥

evaṃ prakṣīṇapāpasya bahubhirjanmabhiḥ kramāt || sāṃbe sarveśvare bhaktirjñānapūrvā prajāyate || 7.1,3.34||

भावानुगुणमीशस्य प्रसादो व्यतिरिच्यते ॥ प्रसादात्कर्मसंत्यागः फलतो न स्वरूपतः ॥ ७.१,३.३५॥

bhāvānuguṇamīśasya prasādo vyatiricyate || prasādātkarmasaṃtyāgaḥ phalato na svarūpataḥ || 7.1,3.35||

तस्मात्कर्मफलत्यागाच्छिवधर्मान्वयः शुभः ॥ स च गुर्वनपेक्षश्च तदपेक्ष इति द्विधा ॥ ७.१,३.३६॥

tasmātkarmaphalatyāgācchivadharmānvayaḥ śubhaḥ || sa ca gurvanapekṣaśca tadapekṣa iti dvidhā || 7.1,3.36||

तत्रानपेक्षात्सापेक्षो मुख्यः शतगुणाधिकः ॥ शिवधर्मान्वयस्यास्य शिवज्ञानसमन्वयः ॥ ७.१,३.३७॥

tatrānapekṣātsāpekṣo mukhyaḥ śataguṇādhikaḥ || śivadharmānvayasyāsya śivajñānasamanvayaḥ || 7.1,3.37||

ज्ञनान्वयवशात्पुंसः संसारे दोषदर्शनम् ॥ ततो विषयवैराग्यं वैराग्याद्भावसाधनम् ॥ ७.१,३.३८॥

jñanānvayavaśātpuṃsaḥ saṃsāre doṣadarśanam || tato viṣayavairāgyaṃ vairāgyādbhāvasādhanam || 7.1,3.38||

भावसिद्ध्युपपन्नस्य ध्याने निष्ठा न कर्मणि ॥ ज्ञानध्यानाभियुक्तस्य पुंसो योगः प्रवर्तते ॥ ७.१,३.३९॥

bhāvasiddhyupapannasya dhyāne niṣṭhā na karmaṇi || jñānadhyānābhiyuktasya puṃso yogaḥ pravartate || 7.1,3.39||

योगेन तु परा भक्तिः प्रसादस्तदनंतरम् ॥ प्रसादान्मुच्यते जंतुर्मुक्तः शिवसमो भवेत् ॥ ७.१,३.४०॥

yogena tu parā bhaktiḥ prasādastadanaṃtaram || prasādānmucyate jaṃturmuktaḥ śivasamo bhavet || 7.1,3.40||

अनुग्रहप्रकारस्य क्रमो ऽयमविवक्षितः ॥ यादृशी योग्यता पुंसस्तस्य तादृगनुग्रहः ॥ ७.१,३.४१॥

anugrahaprakārasya kramo 'yamavivakṣitaḥ || yādṛśī yogyatā puṃsastasya tādṛganugrahaḥ || 7.1,3.41||

गर्भस्थो मुच्यते कश्चिज्जायमानस्तथापरः ॥ बालो वा तरुणो वाथ वृद्धो वा मुच्यते परः ॥ ७.१,३.४२॥

garbhastho mucyate kaścijjāyamānastathāparaḥ || bālo vā taruṇo vātha vṛddho vā mucyate paraḥ || 7.1,3.42||

तिर्यग्योनिगतः कश्चिन्मुच्यते नारको ऽपरः ॥ अपरस्तु पदं प्राप्तो मुच्यते स्वपदक्षये ॥ ७.१,३.४३॥

tiryagyonigataḥ kaścinmucyate nārako 'paraḥ || aparastu padaṃ prāpto mucyate svapadakṣaye || 7.1,3.43||

कश्चित्क्षीणपदो भूत्वा पुनरावर्त्य मुच्यते ॥ कश्चिदध्वगतस्तस्मिन् स्थित्वास्थित्वा विमुच्यते ॥ ७.१,३.४४॥

kaścitkṣīṇapado bhūtvā punarāvartya mucyate || kaścidadhvagatastasmin sthitvāsthitvā vimucyate || 7.1,3.44||

तस्मान्नैकप्रकारेण नराणां मुक्तिरिष्यते ॥ ज्ञानभावानुरूपेण प्रसादेनैव निर्वृतिः ॥ ७.१,३.४५॥

tasmānnaikaprakāreṇa narāṇāṃ muktiriṣyate || jñānabhāvānurūpeṇa prasādenaiva nirvṛtiḥ || 7.1,3.45||

तस्मादस्य प्रसादार्थं वाङ्मनोदोषवर्जिताः ॥ ध्यायंतश्शिवमेवैकं सदारतनयाग्नयः ॥ ७.१,३.४६॥

tasmādasya prasādārthaṃ vāṅmanodoṣavarjitāḥ || dhyāyaṃtaśśivamevaikaṃ sadāratanayāgnayaḥ || 7.1,3.46||

तन्निष्ठास्तत्परास्सर्वे तद्युक्तास्तदुपाश्रयाः ॥ सर्वक्रियाः प्रकुर्वाणास्तमेव मनसागताः ॥ ७.१,३.४७॥

tanniṣṭhāstatparāssarve tadyuktāstadupāśrayāḥ || sarvakriyāḥ prakurvāṇāstameva manasāgatāḥ || 7.1,3.47||

दीर्घसूत्रसमारब्धं दिव्यवर्षसहस्रकम् ॥ सत्रांते मंत्रयोगेन वायुस्तत्र गमिष्यति ॥ ७.१,३.४८॥

dīrghasūtrasamārabdhaṃ divyavarṣasahasrakam || satrāṃte maṃtrayogena vāyustatra gamiṣyati || 7.1,3.48||

स एव भवतः श्रेयः सोपायं कथयिष्यति ॥ ततो वाराणसी पुण्या पुरी परमशोभना ॥ ७.१,३.४९॥

sa eva bhavataḥ śreyaḥ sopāyaṃ kathayiṣyati || tato vārāṇasī puṇyā purī paramaśobhanā || 7.1,3.49||

गंतव्या यत्र विश्वेशो देव्या सह पिनाकधृक् ॥ सदा विहरति श्रीमान् भक्तानुग्रहकारणात् ॥ ७.१,३.५०॥

gaṃtavyā yatra viśveśo devyā saha pinākadhṛk || sadā viharati śrīmān bhaktānugrahakāraṇāt || 7.1,3.50||

तत्राश्चर्यं महद्दृष्ट्वा मत्समीपं गमिष्यथ ॥ ततो वः कथयिष्यामि मोक्षोपाय द्विजोत्तमाः ॥ ७.१,३.५१॥

tatrāścaryaṃ mahaddṛṣṭvā matsamīpaṃ gamiṣyatha || tato vaḥ kathayiṣyāmi mokṣopāya dvijottamāḥ || 7.1,3.51||

येनैकजन्मना मुक्तिर्युष्मत्करतले स्थिता ॥ अनेकजन्मसंसारबंधनिर्मोक्षकारिणी ॥ ७.१,३.५२॥

yenaikajanmanā muktiryuṣmatkaratale sthitā || anekajanmasaṃsārabaṃdhanirmokṣakāriṇī || 7.1,3.52||

एतन्मनोमयं चक्रं मया सृष्टं विसृज्यते ॥ यत्रास्य शीर्यते नेमिः स देशस्तपसश्शुभः ॥ ७.१,३.५३॥

etanmanomayaṃ cakraṃ mayā sṛṣṭaṃ visṛjyate || yatrāsya śīryate nemiḥ sa deśastapasaśśubhaḥ || 7.1,3.53||

इत्युक्त्वा सूर्यसंकाशं चक्रं दृष्ट्वा मनोमयम् ॥ प्रणिपत्य महादेवं विससर्ज पितामहः ॥ ७.१,३.५४॥

ityuktvā sūryasaṃkāśaṃ cakraṃ dṛṣṭvā manomayam || praṇipatya mahādevaṃ visasarja pitāmahaḥ || 7.1,3.54||

ते ऽपि हृष्टतरा विप्राः प्रणम्य जगतां प्रभुम् ॥ प्रययुस्तस्य चक्रस्य यत्र नेमिरशीर्यत ॥ ७.१,३.५५॥

te 'pi hṛṣṭatarā viprāḥ praṇamya jagatāṃ prabhum || prayayustasya cakrasya yatra nemiraśīryata || 7.1,3.55||

चक्रं तदपि संक्षिप्तं श्लक्ष्णं चारुशिलातले ॥ विमलस्वादुपानीये निजपात वने क्वचित् ॥ ७.१,३.५६॥

cakraṃ tadapi saṃkṣiptaṃ ślakṣṇaṃ cāruśilātale || vimalasvādupānīye nijapāta vane kvacit || 7.1,3.56||

तद्वनं तेन विख्यातं नैमिषं मुनिपूजितम् ॥ अनेकयक्षगंधर्वविद्याधरसमाकुलम् ॥ ७.१,३.५७॥

tadvanaṃ tena vikhyātaṃ naimiṣaṃ munipūjitam || anekayakṣagaṃdharvavidyādharasamākulam || 7.1,3.57||

अष्टादश समुद्रस्य द्वीपानश्नन्पुरूरवाः ॥ विलासवशमुर्वश्या यातो दैवेन चोदितः ॥ ७.१,३.५८॥

aṣṭādaśa samudrasya dvīpānaśnanpurūravāḥ || vilāsavaśamurvaśyā yāto daivena coditaḥ || 7.1,3.58||

अक्रमेण हरन्मोहाद्यज्ञवाटं हिरण्मयम् ॥ मुनिभिर्यत्र संक्रुद्धैः कुशवज्रैर्निपातितः ॥ ७.१,३.५९॥

akrameṇa haranmohādyajñavāṭaṃ hiraṇmayam || munibhiryatra saṃkruddhaiḥ kuśavajrairnipātitaḥ || 7.1,3.59||

विश्वं सिसृक्षमाणा वै यत्र विश्वसृजः पुरा ॥ सत्रमारेभिरे दिव्यं ब्रह्मज्ञा गार्हपत्यगाः ॥ ७.१,३.६०॥

viśvaṃ sisṛkṣamāṇā vai yatra viśvasṛjaḥ purā || satramārebhire divyaṃ brahmajñā gārhapatyagāḥ || 7.1,3.60||

ऋषिभिर्यत्र विद्वद्भिः शब्दार्थन्यायकोविदैः ॥ शक्तिप्रज्ञाक्रियायोगैर्विधिरासीदनुष्ठितः ॥ ७.१,३.६१॥

ṛṣibhiryatra vidvadbhiḥ śabdārthanyāyakovidaiḥ || śaktiprajñākriyāyogairvidhirāsīdanuṣṭhitaḥ || 7.1,3.61||

यत्र वेदविदो नित्यं वेदवादबहिष्कृतान् ॥ वादजल्पबलैर्घ्नंति वचोभिरतिवादिनः ॥ ७.१,३.६२॥

yatra vedavido nityaṃ vedavādabahiṣkṛtān || vādajalpabalairghnaṃti vacobhirativādinaḥ || 7.1,3.62||

स्फटिकमयमहीभृत्पादजाभ्यश्शिलाभ्यः प्रसरदमृतकल्पस्स्वच्छपानीयरम्यम् ॥ अतिरसफलवृक्षप्रायमव्यालसत्त्वं तपस उचितमासीन्नैमिषं तन्मुनीनाम् ॥ ७.१,३.६३॥

sphaṭikamayamahībhṛtpādajābhyaśśilābhyaḥ prasaradamṛtakalpassvacchapānīyaramyam || atirasaphalavṛkṣaprāyamavyālasattvaṃ tapasa ucitamāsīnnaimiṣaṃ tanmunīnām || 7.1,3.63||

इति श्रीशिवमहापुराणे सप्तम्यां वायवीयसंहितायां पूर्वखण्डे नैमिषोपाख्यानं नाम तृतीयो ऽध्यायः॥

iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe naimiṣopākhyānaṃ nāma tṛtīyo 'dhyāyaḥ||